Leviticus 16

Usuku lwentethelelo

1UJehova wakhuluma loMosi ngemuva kokufa kwamadodana ka-Aroni azama ukuqondana loJehova. 2UJehova wathi kuMosi, “Tshela umfowenu u-Aroni ukuthi angamani eze nje ngokuthanda kwakhe endaweni eNgcwele Ngcwele ngemuva kwekhetheni phambi kwesihlalo somusa phezu kwebhokisi lesivumelwano, funa afe, ngoba ngiyabonakala ngiseyezini phezu kwesihlalo somusa.

3“U-Aroni uzamele angene endaweni engcwele ngale indlela: Keze leguqa eliyinkunzi kungumnikelo wesono kuthi okomnikelo wokutshiswa kube yinqama. 4Uzagqoka ibhatshi elingcwele elenziwe ngelineni, lezigqoko zangaphansi zelineni emzimbeni; kazibophe ngebhanti elenziwe ngelineni njalo athwale iqhiye yelineni. Lezi yizambatho ezingcwele; ngakho ufanele ageze umzimba ngamanzi anduba agqoke izambatho lezi.

5Kathathe izimbuzi ezinduna ezimbili esizweni sako-Israyeli zibe ngumnikelo wesono lenqama ibe ngumnikelo wokutshiswa.

6“U-Aroni uzanikela ngenkunzi ibe ngumnikelo wesono sakhe ukwenza ukubuyisana kwakhe lokwabendlu yakhe.

7Abesethatha izimbuzi zombili azilethe phambi kukaJehova esangweni leThente lokuHlanganela. 8Uzaphosa inkatho yokubona ngezimbuzi zombili – eyinye ingaba ngekaJehova enye ibe ngeyembuzi yesesulelo.

9U-Aroni uzaletha imbuzi yenkatho kaJehova ibe ngumnikelo wesono. 10Kodwa imbuzi edliwe yinkatho yesesulelo izalethwa kuJehova iphila ukuze isetshenziswe ukwenza ukubuyisana ngokuyixotshela enkangala njengembuzi yesesulelo.

11“U-Aroni uzaletha inkunzi ibe ngumnikelo wesono sakhe ukwenza ukubuyisana kwakhe lokwendlu yakhe, njalo uzayibulala leyonkunzi ibe ngumnikelo wesono sakhe. 12Uzathatha isiphathelo sokutshisela impepha sigcwele amalahle avuthayo ase-alithareni phambi kukaJehova kanye lempepha ecolekileyo enuka kamnandi egcwala izandla ezimbili ayelakho ngemuva kwekhetheni. 13Uzathela impepha emlilweni phambi kukaJehova, kuthi intuthu yempepha isibekele isihlalo somusa esiphezu koBufakazi ukuze angafi. 14Uzathatha elinye igazi lenkunzi achele ngalo ibhokisi lesihlalo somusa phambili kwalo ngomunwe wakhe; ngomunwe wakhe njalo achele kakhombisa phambi kwesihlalo somusa.

15“Ngemva kwalokho uzabulala imbuzi ibe ngumnikelo wesono sabantu abesethatha igazi layo aye ngemva kwekhetheni ayekwenza njengalokhu akwenze ngegazi lenkunzi: Uzachela phezu kwesihlalo somusa laphambili kwaso.

16Ngalokho uzakwenza indlela yokubuyisana yendawo eNgcwele Ngcwele ngenxa yokungcola lokuhlamuka kwabako-Israyeli, kungakhathalekile ukuthi benze sono bani. Uzakwenza njalo into efananayo eThenteni lokuHlanganela eliphakathi kwabo ngokungcola okuphakathi kwabo. 17Kakho ozangena eThenteni lokuHlanganela kusukela ekungeneni kuka-Aroni esiyakwenza indlela yokubuyisana endaweni eNgcwele Ngcwele aze aphume, esezenzele indlela yokubuyisana, leyabendlu yakhe kanye lesizwe sonke sako-Israyeli.

18“Ngakho uzakuza e-alithareni eliphambi kukaJehova alenzele indlela yokubuyisana. Uzathatha elinye igazi lenkunzi lelinye lembuzi aninde ngalo impondo zonke ze-alithare.

19Uzachela elinye igazi ngomunwe wakhe kakhombisa ukulihlanza lokulingcwelisa kulokhu kungcola kwabako-Israyeli.

20“Nxa u-Aroni eseqedile ukwenzela indawo eNgcwele Ngcwele indlela yokubuyisana, iThente lokuHlanganela kanye le-alithare, uzaletha imbuzi ephilayo. 21Uzabeka izandla zakhe zombili ekhanda lale imbuzi ephilayo avumele phezu kwayo ukona lokuhlamuka kwabako-Israyeli – izono zabo zonke – azifake ekhanda lembuzi. Imbuzi le izaxotshelwa enkangala iqhutshwa yindoda ekhethelwe lowomsebenzi. 22Imbuzi izathwala zonke izono zabo, ithubele lazo; indoda izayixotshela enkangala.

23“Ngakho u-Aroni uzangena eThenteni lokuHlanganela akhulule izigqoko zelineni akade ezigqoke engakangeni endaweni eNgcwele Ngcwele, azitshiye khonapho.

24Uzageza umzimba ngamanzi endaweni engcwele abesegqoka izigqoko zakhe. Ngemva kwalokho uzaphuma lapho ayezinikelela umnikelo wokutshiswa kanye lokunikelela abantu umnikelo wokutshiswa, esenza ukubuyisana kwakhe lokwabantu. 25Njalo uzatshisa amahwahwa omnikelo wesono ealithareni.

26“Indoda ezaxotshela imbuzi eyisesulelo kayigezise izigqoko zayo lomzimba ngamanzi; ngemva kwalokho isingangena ezihonqweni.

27Inkunzi kanye lembuzi yomnikelo wesono, okulegazi elilethwe endaweni eNgcwele Ngcwele ukwenzela ukubuyisana, kakukhitshelwe ngaphandle kwezihonqo; kutshiswe izikhumba zakho inyama kanye lezangaphakathi. 28Indoda ezatshisa lokhu kayigezise izigqoko zayo njalo igeze lomzimba wayo ngamanzi; ngemva kwalokho isingangena ezihonqweni.

29“Lokhu kakube yisimiso kini esingapheliyo: Ngosuku lwetshumi ngenyanga yesikhombisa lizidele lingabambi umsebenzi – loba lingabanini bendawo loba kungabezizwe phakathi kwenu – 30ngenxa yokuthi ngalolusuku lizakwenzelwa ukubuyisana, ukulihlanza. Ngakho, phambi kukaJehova, lizabe selihlanzekile ezonweni zenu zonke.

31KuliSabatha lokuphumula, ngakho kumele lizidele, kuyisimiso esingapheliyo. 32Umphristi ogcotshiweyo wabekwa ukuthatha isikhundla sikayise ukuba ngumphristi omkhulu uzakwenza indlela yokubuyisana. Uzagqoka izigqoko ezingcwele zelineni 33enze ukubuyisana kwendawo eNgcwele Ngcwele, lokweThente lokuHlanganela lokwe-alithare, lokwabaphristi kanye labantu bonke bakuleyondawo.

34Lokhu kuzakuba yisimiso esingapheliyo kini: Ukubuyisana kakwenziwe kanye ngomnyaka kusenzelwa zonke izono zabako-Israyeli.” Lokhu kwenziwa, njengokulaywa kukaMosi nguJehova.